Кондак 1
Избранная угоднице Царя Небеснаго, истинная служительнице Пресвятыя Богородицы, новая чудотворице и предивная православным помощнице преподобная мати Рахиле, прославляюще прославльшаго тя Господа, воспеваем ти похвальная, ты же, имущи дерзновение ко Святей Троице, от всяких нас бед свободй, да зовем ти: Радуйся, мати Рахиле, обители Бородинския похвало и радование.
Икос 1
Ангелов Творец и славы Господь дарова тя, мати Рахиле, во дни смуты и мятежа скорбным утешение и малодушным укрепление, да, видяще равноангельное житие твое и чудес струю выну текущую, веру Православную небоязненно исповедают, тебе же благодарственно воспевают похвальную песнь сице:
Радуйся, звездо, во мраце безбожия светло возсиявшая;
радуйся, житием твоим Солнце Правды, Христа, проповедавшая.
Радуйся, во времена гонений лютых за правую веру брань мужески подъемшая;
радуйся, новомучеников Церкве Русския сопричастнице.
Радуйся, всеусердно заповеди Господни возлюбившая;
радуйся, лествицею добродетелей в Царствие Небесное востекшая.
Радуйся, на земли ангельски пожившая;
радуйся, от Отца Небеснаго венец нетленнный приемшая.
Радуйся, падших к покаянию наставление;
радуйся, скорбящих от бед избавление.
Радуйся, за землю Русскую предстательнице непостыдная;
радуйся, о воинстве православнем молитвеннице теплая.
Радуйся, мати Рахиле, обители Бородинския похвало и радование.
Кондак 2
Видя Господь благое сердца твоего изволение, яко издетска послужити Ему восхотела еси, призва тя на тесный и прискорбный путь жития иноческаго, к Царствию Небесному ведущий. Ты же, всем сердцем, всею душею и всею крепостию твоею Творца возлюбивши, непрестанно взывала еси: Аллилуиа.
Икос 2
Разум совершенный в юных летех стяжала еси, преподобная, суетных утех мира сего отвращающися и душу твою Божественными
писании веселящи. Мы же, дивящеся богоугодному житию твоему, со умилением зовем:
Радуйся, храм Божий и молитву возлюбившая;
радуйся, безмолвию и богомыслию прилежавшая.
Радуйся, начало подвигом твоим от юности положшая; радуйся, главу твою под благое иго Христово подкл6ныпая.
Радуйся, благочестивых родйтелей отрасль пречестная;
радуйся, Христа ради дом родительский оставльшая.
Радуйся, нрав боголюбйвый стяжавшая;
радуйся, словом Божиим й твой просветившая.
Радуйся, яко душу твою соделала еси храмом Бога Живаго;
радуйся, яко в сердце твое вселися Дух Святый.
Радуйся, светом благодати осиянная;
радуйся, Вышней премудрости наученная.
Радуйся, мати Рахиле, обители Бородинския похвало и радование.
Кондак 3
Силою Вышняго и неисповедимым Его Промыслом ведома, притекла еси в Киев, поклонения ради честным мощем преподобнаго Феодосия, егоже измлада почитала еси; святую же Лавру Печерскую узревши, воспела еси благих Подателю Богу: Аллилуиа.
Икос 3
Имущи желание равноангельнаго иноческаго жития, отроковице боголюбивая, просила еси богоноснаго Феодосия пред ракою святых мощей его волю Божию о тебе уяснити. Мы же, видяще толикое твое тщание и веру к преподобному несумненну, вопием ти:
Радуйся, общаго жития в Русской земли начальника усердно почитавшая;
радуйся, к святым мощем его с верою притекшая.
Радуйся, невидимою силою прямо раки поставленная;
радуйся, к подножию ея со слезами приклонившаяся.
Радуйся, явления преподобнаго Феодосия сподобльшаяся;
радуйся, лицем к лицу с ним глаголавшая.
Радуйся, от святаго игумена Лавры благословение приимшая;
радуйся, на путь монашеский им управленная.
Радуйся, преподобным, яко отцем, в житии твоем руководимая;
радуйся, с нимже ныне в Царствии Небеснем прославленная.
Радуйся, розго младая, к лозе монашества русскаго привитая;
радуйся, плод сторичный Богови принесшая.
Радуйся, мати Рахиле, обители Бородинския похвало и радование.
Кондак 4
Бурю внутрь помышлений имела еси, преподобная Рахиле, како волю Божию исполните и в послушании пребыти родителю благочестивому, хотящему тя браком сочетати, обаче Единому Жениху, паче всех человек краснейшу, душею уневестилася еси, поющи Богу: Аллилуиа.
Икос 4
Слышав родитель твой, яко ты, преподобная, во град Смоленск к иконе Богородицы Одигитрии притекла еси и во обитель Вознесенскую вселилася еси, волю Божию разуме и на подвиг иноческий тя благослови. Ты же, нищету Христову возлюбивши, вся, яже име, нуждающимся раздала еси и труды многими плоть изнуряла еси. Сего ради вопием ти:
Радуйся, упование на Матерь Божию возложившая;
радуйся, козни вражия помощию Пречистыя победившая.
Радуйся, благословение Тоя получившая;
радуйся, во обитель Вознесения Ею управленная.
Радуйся, земным раем святую обитель почитавшая;
радуйся, тамо сердцем и усты немолчно Творца прославлявшая.
Радуйся, яко птица тенет мирскаго жития избежавшая;
радуйся, голубице, под кровом Вышняго вселившаяся.
Радуйся, агнице чистей тезоименитая;
радуйся, кротость агнчую стяжавшая.
Радуйся, дворы Господни в жилище себе избравшая;
радуйся, с мудрыми девами в брачный чертог радостно вшедшая.
Радуйся, мати Рахиле, обители Бородинския похвало и радование.
Кондак 5
Богоданную и путеводную звезду имущи, Рахиле, пречуднаго Феодосия, житию его святому и подвигом поревновала еси, таже неленостное служение ближним, пощение, бдение, еще же и плоти умерщвление и иныя многия труды спасения ради подъяла еси. Мы же, видяще толикую любовь твою ко Господу, поем Укрепльшему тя: Аллилуиа.
Икос 5
Восхотевши Богу угодити, во обитель иноческую вселилася еси, преподобная, идеже плоть твою удручити потщалася еси; видящи же, яко родитель не остави тя попечением, вси дары его нуждающимся раздавала еси. Послежде, подвига вящшаго восхотевши, странничество подъяла еси. Мы же, дивящеся толикому твоему к добродетели рачению, глаголем:
Радуйся, заповедей Господних хранительнице усердная;
радуйся, совершеннаго нестяжания исполненная.
Радуйся, словесы Божиими ум твой просветившая;
радуйся, прелести мира сего сердцем отвергшая.
Радуйся, постническаго жития истинное правило;
радуйся, подвигом древних жен подражание.
Радуйся, риз лепоту и доброту телесную презревшая;
радуйся, одеяние, Чертогу Небесному прилйчное, паче возлюбившая.
Радуйся, властительства страстей мудре избежавшая;
радуйся, единому Богу служити восхотевшая.
Радуйся, яко в невестнице Христовом присно живеши;
радуйся, яко и нас предстательством твоим не оставлявши.
Радуйся, мати Рахиле, обители Бородинския похвало и радование.
Кондак 6
Проповедует земля Смоленская славу Божию, ты бо, Рахиле блаженная, еще в новоначалии сущи, брашна и хлебы помощию Богородицы чудесно умножила еси и, многия люди напитавши, коварство наветников твоих посрамила еси, не ведущих пети: Аллилуиа.
Икос 6
Осия душу твою, мати преподобная, благодатный свет, егда Пречистая Богородица явися ти, благословляющи странствие твое и обещающи хранити тя от наветов вражиих и козней злых человек. Ты же, непрестанно радующися о Господе, спасительный путь прохождала еси. Сего ради ублажаем тя сице:
Радуйся, яко странница Христа ради явилася еси;
радуйся, яко во смирении крест твой понесла еси.
Радуйся, суету мира сего отвергшая;
радуйся, на Господа и Богородицу упование возложившая.
Радуйся, яко мраз и глад мужески претерпела еси;
радуйся, яко злостраданий телесных не убоялася еси.
Радуйся, девство, аки многоценный бисер, хранившая;
радуйся, о сем Богородицу со слезами молившая.
Радуйся, Христа всем сердцем возлюбившая;
радуйся, благодать Духа Святаго стяжавшая.
Радуйся, яко пищи нетленныя причащаешися; радуйся, яко Небеснаго Царствия наслаждаешися.
Радуйся, мати Рахиле, обители Бородинския похвало и радование.
Кондак 7
Хотя Человеколюбец Господь явити тя, богоблаженная мати Рахиле, людем Своим, путь твой в Святогорскую пустынь управи, идеже преподобный Иоанн Затворник, в духовнем делании тя утвердив, благослови странничество оставите. Ты же, тайны многия от него уведевши и богомудрая словеса услышавши, в радости вопияла еси: Аллилуиа.
Икос 7
Нбвыя подвиги и труды во обители Пресвятыя Богородицы подъемши, Рахиле преподобная, главу прегордаго велиара смирением твоим уязвила еси и Духа Святаго достойное приятелище явилася еси, сего ради зовем ти:
Радуйся, Пречистую Владычицу заступницею имевшая; радуйся, во обитель Введенскую Ею управленная.
Радуйся, сестрам всеусердно послужившая;
радуйся, в послушании на поварни дары благодатныя стяжавшая. Радуйся, дом добродетели на камени заповедей утвердившая;
радуйся, фараона мысленнаго в мори смирения потопившая.
Радуйся, на мир, плоть и диавола брань мужески подъемшая;
радуйся, венец победы от Подвигоположника приимшая.
Радуйся, Господа серафимскою любовию возлюбившая; радуйся, чести безплотных на Небеси сподобльшаяся.
Радуйся, яко со всеми святыми Богу предстоиши; радуйся, яко милость Его на нас призывавши.
Радуйся, мати Рахиле, обители Бородинския похвало и радование.
Кондак 8
Странница сущи на земли, Отечества Небеснаго взыскала еси, преподобная, темже и сподоби тя Господь Небеса отверстая и Ангелов, иереем сослужащих, зрети, егда при олтари святем служила еси во обители Пречистаго Образа Спасова, Богу воспевающи: Аллилуиа.
Икос 8
Все житие твое, преподобная мати, жертва непорочная и благоухание приятное Гбсподеви явися. Ты бо, немощи немощных понесши, закон Христов исполнила еси и многих приходящих к тебе с любовию утешала еси. Темже вопием ти:
Радуйся, во обители Нерукотворнаго Образа потрудившаяся;
радуйся, нерукотворный храм душй твоей добродетельми украсившая.
Радуйся, яко Духа Святаго благодать стяжала еси;
радуйся, яко образ добраго жительства показала еси.
Радуйся, духовная чада твоя словесным млеком питавшая;
радуйся, любовию твоею их согревавшая.
Радуйся, мати наша чадолюбивая;
радуйся, старице мудрая и прозорливая.
Радуйся, заповеди Господни творити нас научающая;
радуйся, окамененная сердца к покаянию обращающая.
Радуйся, болящим и скорбным скорая помощнице;
радуйся, заблуждшим на путь истины наставнице.
Радуйся, мати Рахиле, обители Бородинския похвало и радование.
Кондак 9
Всеусердно молитву ко Господу совершающи, Рахиле блаженная, во псалмех и пениих непрестанно поминала еси воинов православных, за веру, царя и Отечество души своя положйвших. Темже и зрительница видений пречудных явилася еси, яко мнози от них в ризах белых Богу предстоят и вопиют Ему песнь победную: Аллилуиа.
Икос 9
Ветии многовещаннии не возмогут изрещи обилие любве твоей, преподобная, юже на люди, к тебе приходящия, независтно изливала еси. Ты бо, в немощи телесней сущи, молитвы и попечения о ближних не оставляла еси и силою Божиею врачевания тем подавала еси. Сего ради восхваляем тя сице:
Радуйся, любовь Христову людем проповедавшая;
радуйся, немощных в вере укрепившая.
Радуйся, истиннаго любомудрия ревнительнице;
радуйся, пищи духовныя и телесныя подательнице.
Радуйся, плавающих по морю жития сего окормляющая;
радуйся, юныя благочестию научающая.
Радуйся, дара пророчества исполненная;
радуйся, будущая яко настоящая зревшая.
Радуйся, оставленных врачьми со одра болезни воздвизающая;
радуйся, от внезапныя смерти избавлйющая.
Радуйся, отступивших от правыя веры вразумляющая;
радуйся, от погибели душевныя спасающая.
Радуйся, мати Рахиле, обители Бородинския похвало и радование.
Кондак 10
Спасти хотя заблуждших, милосердный Бог яви тя, преподобная Рахиле, верную угодницу Свою, да наставиши их на путь покаяния, и да возсияет паки во Отечестве нашем свет веры Христовой. Мы же, дивящеся таковому о тебе Божию промышлению, вопием: Аллилуиа.
Икос 10
Стена благочестия непоколеблема явльшися, преподобная мати Рахиле, ограждала еси притекающих к тебе от душепагубных учений и укрепляла малодушных, в молитвах о них предстательствующи, еще же и многими увещаньми ко грядущим бедам их предуготовляла еси. Мы же, зряще многую любовь твою и попечение о людех, умильно глаголем:
Радуйся, Православия стено нерушимая; радуйся, любве лампадо неугасимая.
Радуйся, присно о нас пред Богом предстательствующая; радуйся, человеки от бед и скорбей избавляющая.
Радуйся, свеще, светом Христовым сияющая; радуйся, мрак злобы бесовския разсеявающая.
Радуйся, многих заблуждших из бездны греховныя исхитившая; радуйся, тех на путь покаяния наставившая.
Радуйся, милование Христово к немощным проповедавшая; радуйся, и неверных с любовию принимавшая.
Радуйся, неимущих вдов и сирот снабдевающая; радуйся, алчущих и жаждущих насыщающая.
Радуйся, мати Рахиле, обители Бородинския похвало и радование.
Кондак 11
Пение всякое не возможет изрещи богатство духовных дарований твоих, Рахиле преподобная, яко не токмо строгим постническим житием просияла еси, но и ближнему безмездно послужила еси, и веру Христову пред гонители богоборными исповедала еси. Темже мы, славяще Бога дивнаго во святых Своих, поем: Аллилуиа.
Икос 11
Свешу, Богом явленную, зрим тя, всеблаженная мати наша Рахиле, возсияла бо еси светом добродетельнаго жития твоего людем, во тьме неразумия сущим, егда оскуде на Руси преподобие и умалися истина от сынов человеческих. Темже почитаем тя звании сицевыми:
Радуйся, Христа, Солнца Правды, луче пресветлая;
радуйся, Господа, Света Невечерняго, служительнице верная.
Радуйся, словесы твоими души просвещающая;
радуйся, враги Церкве Христовы устрашающая.
Радуйся, чистых дев ко Христу невестоводительнице;
радуйся, целомудрия любителей наставнице.
Радуйся, чад твоих на подвиг исповедничества благословившая; радуйся, молитвами твоими их укрепившая.
Радуйся, духовнаго просвещения светильниче небосветлый;
радуйся, милосердия и милостыни источниче неисчерпаемый.
Радуйся, нас, грешных, к покаянию призывающая;
радуйся, ближняго любити научающая.
Радуйся, мати Рахиле, обители Бородинския похвало и радование.
Кондак 12
Благодати Духа Святаго исполни Человеколюбец Господь тя, блаженная Рахиле, и показа во дни гонения на Церковь Христову новую Свою угодницу и за Русь неусыпную молитвенницу, да вернии во благочестии укрепятся, отступницы же к Богу обратятся, в покаянии зовуще: Аллилуиа.
Икос 12
Поюще честное твое преставление, преподобная мати Рахиле, хвалим тя вси, тобою бо милосердный Господь яви милость Свою к нам, и всех воспевали тебе научи:
Радуйся, святая, со всеми святыми на Небесех торжествующая;
радуйся, преподобная, со всеми преподобными песнь Богови воспевающая.
Радуйся, в ризы светлыя ныне облеченная;
радуйся, красотою девства украшенная.
Радуйся, от Христа венец достойный приемшая;
радуйся, в Царствие Небесное путь нам показавшая.
Радуйся, целительнице, врачевание недугов подающая;
радуйся, предстательнице о нас пред Богом непостыдная.
Радуйся, Церкве Христовы оружнице непобедимая;
радуйся, иноком во брани духовней наставнице богомудрая.
Радуйся, вертограда Бородинскаго маслина плодовитая;
радуйся, россййскаго луга духовнаго цвете благовонный.
Радуйся, мати Рахиле, обители Бородинския похвало и радование.
Кондак 13
О преблаженная и богомудрая мати наша Рахиле! Не забуди убогих чад твоих, приими малое сие моление и принеси ко Престолу Вседержителя, умоли помиловати нас, грешных, да на Страшнем Судищи не помянет Господь грехов и беззаконий наших, наипаче же Царствия Небеснаго сподобит, да благодарственно вопием: Аллилуиа.
Молитва
О незлобивая и кроткая, предивная старице, преподобная мати Рахиле, новая чудотворице и молитвеннице за род христианский! Во дни земнаго жития твоего Христа единаго всем сердцем возлюбила еси и якоже странница не имела еси зде пребывающаго града, грядущаго взыскующи. Постом и молитвою, смирением и труды душу твою очистила еси от страстей и всякаго лукавства. Темже, преподобная мати, явилася еси болящим безмездная целительница, алчущим милостивая кормительница, заблуждшим наставница, скорбящим и обидимым милосердная утешительница и всем, притекающим к тебе, чадолюбивая мати.
О верная слуго Христова, сторицею умножившая данный тебе талант, воистину вемы, яко дана тебе от Господа и Пречистыя Богородицы благодать молитися за ны. Сего ради уврачуй страсти душ и телес наших, укрепи нас в добродетели и настави на путь покаяния, умягчи окамененная сердца наша, да паче всего возлюбим Христа и ближняго своего.
Умолй Господа сил пробавити милость Свою на многострадальное Отечество наше и на святую обитель [сию], в ней же подвизалася еси, да тихое и безмолвное житие поживем во всяком благочестии и чистоте, и тако достигнем в немятежное пристанище Небеснаго Царствия, идеже ты в незаходимей сияеши славе, воспевающи со всеми святыми хвалебную песнь Отцу и Сыну и Святому Духу ныне и присно и во веки веков. Амйнь.
Ина молитва
О достоблаженная старице, преподобная мати Рахиле, скорая наша утешительнице и целительнице! Приими ныне моление недостойных чад твоих и принеси сей малый плод сердец и устен наших ко Престолу Вседержителя, да предстательством твоим низпослет щедроты Своя: [обйтели сей подаст благоденствие,] Отечество наше
избавит от труса, огня, меча, нашествия иноплеменник и междоусобныя брани; да дарует недужным исцеление, скорбящим утешение, гордым смирение, нерадивым к покаянию обращение, монашествующим в подвизех укрепление, и всем православным христианом да подаст милость на Страшнем Судищи Своем и вселит в обители Небесныя со всеми святыми, да всегда прославляем Отца и Сына и Святаго Духа ныне и присно и во веки веков. Амйнь.
